本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝各位家長嘅體諒同理解！
狗狗肚屙點算好？拆解 8 個造成狗狗拉肚子嘅原因！
便便是判斷狗狗消化道健康嘅重要指標，作為剷屎官嘅你，係咪每日都有仔細觀察主子嘅便便呢？
如果發現狗狗肚屙（腹瀉）都唔使太緊張，因為肚屙唔一定係生病，可能同以下原因有關：
狗狗肚屙原因 1：寄生蟲感染
寄生蟲通常係透過飲食或者環境傳播。唔少家長會每日帶狗狗出街散步，狗狗東聞聞、西舔舔，就容易感染寄生蟲。
寄生蟲如蛔蟲、鞭毛蟲同鉤蟲會影響腸道健康，導致腹瀉、嘔吐同體重減輕等徵狀。
狗狗肚屙原因 2：飲食因素
飲食係造成狗狗肚屙最常見嘅原因。突然改變狗狗嘅飲食習慣或者糧嘅種類，可能會令狗狗腸胃唔適應，造成腹瀉。尤其係腸胃嬌嫩嘅幼犬，更加需要細心呵護。
正確嘅轉糧方式應該係將新舊糧按比例混合，由少量新糧開始慢慢增加，直至完全替代舊糧。通常需要大約 7-10 日嘅過渡期，期間要仔細觀察主子嘅便便同身體狀況。
延伸閱讀：【汪喵知識教室】寵物點樣成功轉糧？
狗狗肚屙原因 3：食到變質食物
如果狗狗誤食咗變質或腐爛嘅食物，可能會導致肚屙或嘔吐。
有啲家長鍾意畀狗狗食自製鮮食，夏天嗰陣要特別留意食物有無異味、發霉或變壞。各類食材應妥善冷藏、密封好。
散步嗰陣，亦要留意主子有無喺你視線範圍外偷食垃圾、腐爛嘅小動物屍體，或者接觸到其他動物嘅排泄物。
狗狗肚屙原因 4：壓力、緊張或焦慮
狗狗喺壓力大、緊張或焦慮嗰陣，亦可能會出現肚屙嘅情況。
例如搬屋、屋企有新成員加入，或者主人長期缺乏陪伴等，都可能成為狗狗嘅心理壓力來源。
狗狗肚屙原因 5：吞咗異物
多數狗狗都係好奇寶寶，尤其係換牙期嘅狗狗特別鍾意亂咬嘢。當你唔喺屋企嗰陣，危險嘅電線、橡皮筋、牙籤、包裝紙、拖鞋甚至電池，都可能被佢哋吞落肚。
呢啲嘢如果入咗肚，唔單止會肚屙，仲可能造成腸絞痛、嘔吐、腹膜炎甚至致命，家長千萬要小心。
延伸閱讀：點樣判斷貓狗食咗異物？主子噎親徵狀、處理及危險品一覽！
狗狗肚屙原因 6：食物中毒
家長都知道朱古力、洋蔥、提子、夏威夷果、咖啡等食物狗狗係絕對唔食得嘅。
如果狗狗誤食，會出現上吐下瀉，通常仲會伴隨異常出血、抽筋、抖氣困難等徵狀，一定要立即送院。
延伸閱讀：狗狗食得乳酪嗎？破解 4 個餵食迷思，呢啲食物絕對唔食得
狗狗肚屙原因 7：疾病因素
胰臟炎、腸胃炎、病毒感染（如犬細小病毒）等疾病，都可能導致狗狗一直肚屙或者拉水便，並伴隨嘔吐、冇胃口或體重下降。見到呢啲徵狀，應該馬上帶主子去診所。
狗狗肚屙原因 8：品種因素
有啲狗狗天生腸胃就比較敏感，需要家長多加留神。容易有腸胃問題嘅品種包括：
- 八哥 (Pug)
- 金毛尋回犬 (Golden Retriever)
- 拳師犬 (Boxer)
- 大丹犬 (Great Dane)
- 約克夏 (Yorkshire Terrier)
- 貴婦狗 (Poodle)
- 秋田犬 (Akita)
狗狗腹瀉咪驚慌！先觀察便便顏色同形狀！
想知狗狗身體發生咩事，可以由便便嘅顏色同形狀判斷。
（一）7 種狗便便顏色含義
1. 啡色 / 黃褐色：正常健康嘅顏色。
2. 黑色：黑色便便（好似柏油咁）可能係上消化道出血，或者係食咗含鐵量高嘅食物（如大量牛肉、菠菜）。
3. 紅色：食咗火龍果、西瓜等含紅色色素嘅食物會變紅。如果無食過呢類嘢，就代表**肚屙帶血**，可能同結腸炎、胃腸道出血、直腸受傷或肛門腺感染有關，必須睇醫生。
4. 綠色：可能係食咗太多草或者綠色蔬菜。如果狗狗不停食草，通常代表佢肚入面唔舒服。
5. 橘黃色：可能代表肝臟或膽囊有問題。
6. 啡色帶白色斑點：白色點點好可能係寄生蟲（如絛蟲），應盡快杜蟲。
7. 白色：代表飲食中鈣質過高，通常係食得太多骨頭引起，要注意營養均衡。
（二）狗狗便便形狀解析
1. 有明顯顆粒或裂紋：便便乾燥硬身，代表主子唔夠水分或纖維，有輕微便秘。
2. 香腸狀或圓柱形：最健康嘅形狀。表面有光澤、軟硬適中，代表消化系統運作良好。
3. 鬆散嘅塊狀：質地柔軟，拎起會變形，屬於「軟便」，代表有輕微腹瀉，要持續觀察。
4. 不成形嘅麵糊狀：典型腹瀉徵狀，好難用膠袋抓起。
5. 水狀：質地極稀，屬於嚴重腹瀉。
6. 果凍狀：如果便便包住一層厚厚嘅黏液，代表消化系統發炎，將腸黏膜一齊排咗出嚟。
狗狗肚屙點算好？常見 FAQ 家長快啲記低！
Q：狗狗肚屙要禁食嗎？
如果肚屙得比較嚴重，建議短期禁食 12-24 小時，等腸胃休息。之後復食可以參考下面嘅建議。
Q：狗狗肚屙食乜好？可以食益生菌嗎？
可以食啲低脂、易消化嘅嘢食，例如水煮雞胸肉、番薯、南瓜、少量青菜等。千祈唔好畀零食或者人食嘅嘢。建議少量多餐。
康復後諮詢過獸醫意見，可以喺糧入面加啲益生菌，幫手培養腸道好菌，維持消化道機能。
Q：點解狗狗肚屙會一直飲水？
肚屙會令身體流失大量水分，狗狗本能會感到口渴，想要補返啲水，呢個係正常反應，唔使太擔心。
Q：狗狗肚屙但精神好，要睇醫生嗎？
肚屙可大可小，你可以根據以下 2 點判斷：
- 腹瀉是否持續超過 48 小時：超過兩日就一定要睇醫生。
- 有無其他徵狀：如果狗狗能食、能跑、精神好，可以先觀察；但如果伴隨嘔吐、發燒、冇胃口，就要馬上就醫。
Q：狗狗肚屙可以食咩藥？
所有藥物一定要由獸醫開。千萬唔好隨便畀狗狗食人嘅腸胃藥（如表飛鳴等），劑量唔啱好危險！
參考資料
- VCA Hospitals – Ingestion of Foreign Bodies in Dogs
- PetMD – What to Feed a Dog with Diarrhea
