喵喵喵～～～！貓咪一直喵喵叫到底想講咩？如果主子一直「凹嗚」咁叫，可能係想剷屎官幫手做嘢㗎！點樣知貓叫聲係咩意思？即刻下滑，一齊睇吓貓叫聲翻譯蒟蒻！
貓叫聲 1：喵～～凹～嗚～（中長音）
成因
當貓咪傳出「喵～～凹～嗚～」嘅叫聲，通常係佢哋喺度表達需求或者「發牢騷」呀～
翻譯成廣東話大概係：「理吓我啦！」、「肚餓呀～我要食飯！」、「快啲陪我玩！」等。剷屎官可以根據主子身處嘅位置嚟推斷佢哋想表達乜嘢：
- 喺糧碗側邊 → 想開餐
- 喺房門口 → 想你開門
- 無啦啦周圍叫 → 求關注、想玩
解決方法
呢個時候家長可以盡力滿足主子！相對應嘅做法如下：
- 糧碗邊 → 檢查下糧同水夠唔夠
- 門口 → 考慮開門等佢哋自由活動（但要注意單位窗戶有無裝貓網）
- 無啦啦叫 → 輕輕摸吓佢，或者拎支逗貓棒出嚟放電
聽到呢種叫聲，千祈唔好忽視佢。畢竟高冷主子難得開口要求，如果唔理佢，佢可能會覺得寂寞㗎。多啲理解佢哋嘅小願望，感情自然會更好！
貓叫聲 2：喵！凹！（短音）
成因
當聽到「喵！凹！」嘅短叫聲，通常係主子回應緊你，或者同你打招呼。
翻譯成人類語言大概係：「哈囉！」、「我喺度呀！」、「嗯！知喇！」咁嘅意思。
解決方法
你可以主動回應返主子！試吓蹲低伸出食指，等貓咪行埋嚟聞吓。如果佢心情好，可能會舔吓你手，或者用個頭磨蹭你示好哦～
貓叫聲 3：喵、喵～（無聲氣音）
成因
當奴才聽到只有氣音、無乜聲嘅「喵～」，就係主子喺度撒嬌喇～
翻譯成人類語言就是：「你係我最愛嘅媽咪/爹哋！」、「我好鍾意你呀～」、「我好掛住你呀～」。仔細聽吓，聽到嗰陣真係成個人都融化晒，咩煩惱都無晒！
解決方法
剷屎官一定要趁機回應返佢嘅愛！輕輕摸吓佢個頭或者下巴，等佢感受到你都一樣咁愛佢。
貓叫聲 4：哈 —— 嘶 ——！（噴氣聲）
成因
聽到「哈 —— 嘶 ——」嗰陣，就係主子傳出嚴重警告訊息！
翻譯成人話就係：「行開！咪埋嚟！」、「呢度好可怕呀！」、「你係邊個！？我唔識你！」。通常喺見到陌生人、動物，或者去到陌生環境感到好驚、不安嗰陣會發生。
解決方法
如果主子感到驚同不安，千祈唔好夾硬抱佢。先確保佢有足夠嘅地方「匿埋」，同佢講嘢嗰陣要細聲啲，慢慢等佢恢復安全感。
貓叫聲 5：喵 —— 嗚 ——！（長咆哮）
成因
聽到呢種「低沉長鳴」就要醒水喇！呢個係主子即將要發動攻擊嘅最後通牒！
翻譯成人話會係：「我要開你火喇！」、「我真係會咬你㗎！」咁樣。
解決方法
呢個時候最好「識趣啲」，乖乖離開現場，等佢自己冷靜吓先，唔好再去刺激佢。
貓叫聲 6：喵～～凹凹～～～！（高聲尖叫）
成因
聽到呢種好似慘叫咁嘅尖叫聲，代表貓咪極度驚慌、受到嚴重驚嚇！
翻譯成人話就係：「救命呀！！！」、「好驚呀！！！」嘅求救訊號。
解決方法
呢個時候要溫柔咁安撫主子，保持單位安靜，畀佢有一個安全、黑暗嘅位匿埋。如果主子受驚後持續表現焦慮，記得要搵獸醫睇睇有無傷到或者情緒受損。
貓咪呼吸好大聲？原來係超舒服嘅呼嚕聲！
貓咪喺極度放鬆、舒服、安心嗰陣，橫膈膜會推動空氣，傳出「呼嚕嚕」嘅共鳴聲。
如果佢一邊呼嚕一邊喵叫，就會出現好似「小恐龍」咁嘅咯咯聲，超得意㗎！唔好被呢隻「小恐龍」嚇親呀～
掌握咗貓叫聲嘅語言規律，先可以滿足主子嘅各種需求。剷屎官們，你哋學識點同主子「傾偈」未？
延伸閱讀：小貓一直發出呼嚕聲？係開心定病咗？3 個幼貓呼嚕冷知識
延伸閱讀：【汪喵冷知識】貓咪張開口喵唔出聲，其實係同你撒緊嬌？
參考資料
- Modern Cat – 12 sounds cats make and what they mean
- Rover – Cat noise meanings
- Purina – Cat meow meaning
