原因一：貓咪嘅生理時鐘
貓咪屬於「晨昏性動物」，而唔係純夜行性，黃昏同半夜係佢哋最有活力嘅時段。雖然家貓唔使打獵都有得食，但骨子裏仲保留住原始天性，鍾意喺呢啲時間打獵同進食。
解決方法：無視佢、徹底「裝死」
第一步通常係最痛苦嘅，你一定要試圖改變貓咪嘅作息，而唔係遷就佢。當「貓鬧鐘」響嗰陣，你要完全無視佢、繼續合埋眼、身體唔好郁，簡單嚟講就係裝死。要令佢明白「貓鬧鐘」喺你身上係無效嘅。
如果你因為怕嘈而起返身餵佢或者安撫佢，佢會以為只要咁做就有獎勵（零食/關注）。就算你係大聲鬧佢，對佢嚟講都係一種「得到關注」，反而會進一步鼓勵佢呢種行為。
原因二：主子想你陪佢玩
對大部分返工一族嚟講，返到屋企食完飯、滑吓手機就想瞓。但主子可能已經喺屋企瞓咗大半日，好唔容易等到你返嚟，點知你完全無幫佢「放電」。精力無處發洩，自然會喺凌晨時分「提醒」你佢好悶。
解決方法 1：睡前進行「狩獵遊戲」
貓咪有強烈嘅打獵慾望。建議睡前花 15-30 分鐘用逗貓棒同佢瘋狂互動，一定要有「追捕」同「飛撲」嘅動作，令佢體力透支。遊戲結束前要慢慢減慢節奏，畀佢有種捕獲獵物嘅成就感。
解決方法 2：晚上限定玩具
如果主子精力真係太旺盛，可以準備一啲可以獨自玩嘅玩具，但記住要係「夜晚先會拎出嚟」嘅，因為長擺喺度嘅玩具佢哋好快就會玩厭。
解決方法 3：打造垂直活動空間
喺單位入面加設貓跳台、吊床等垂直空間，畀佢哋半夜有得爬上爬落消磨時間。如果可以將設施擺喺窗邊，等佢哋夜晚可以睇吓窗外嘅夜景或者小昆蟲就更好。
原因三：個肚餓到咕咕叫
有時主子凌晨嘈醒你純粹係因為肚餓。呢個通常係因為晚餐餵得太早。但記住，呢個時候千萬唔好即刻餵嘢食安撫佢！咁樣係治標不治本，只會令佢每日準時叫醒你。
解決方法：延遲晚餐時間
試吓將每日最後一餐嘅時間推遲少少，令佢無咁快肚餓。同時要堅持定時、定量，令佢習慣只有喺特定時間先會有嘢食。
原因四：情緒焦慮
最後，有啲貓咪性格比較敏感緊張，焦慮會直接導致生理時鐘混亂。搬屋、寄宿、單位有新成員入屋或者附近有噪音，都可能令佢哋不安而半夜大叫。
解決方法： 補充天然紓壓成分
針對容易緊張嘅主子，除咗搵出壓力來源，亦可以適量補充天然胺基酸（如 L-茶氨酸）。呢類保健品有助調節自律神經，穩定情緒，令主子可以瞓得更安穩。
就算平時淡定嘅主子，遇到突發狀況（如裝修、放煙花）都可能焦慮。喺關鍵時刻補充 汪喵紓壓保養粉，可以有效安撫主子情緒，減少半夜擾人清夢嘅機會。
只要幫主子建立好固定嘅日常活動規律，再加上適當嘅情緒安撫，佢哋自然就會乖乖瞓覺，唔再做一個吃力不討好嘅「貓鬧鐘」啦！
Cat Wise (Pam Johnson-Bennett); The Spruce Pets: How to Stop Your Cat From Waking You at Night; PetMD: Treating the Cat That Won’t Sleep at Night.
