本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝各位家長嘅體諒同理解！
狗狗皮膚病、抓癢抓不停？常見嘅狗狗皮膚病徵狀！
主子成日「身痕」，抓到停唔到手？香港天氣潮濕多雨，好容易令狗狗悶出皮膚病。如果主子有以下徵狀，家長就要多加留意喇。
- 頻繁舔、抓、啃咬某個位置
狗狗平時抓癢頻率大約一日 2 – 3 次，如果你發現佢反覆抓同一個位，甚至用牙咬腳掌或者身體，就要檢查吓佢啲皮膚喇。
- 皮膚出現皮屑
皮膚變到好乾，出現脫皮或者好似頭皮咁嘅白色片狀物。
- 皮膚結痂或有傷口
反覆感染嘅位置會形成結痂，有時甚至會有滲血或者潰爛嘅傷口。
- 局部掉毛（跌毛）
毛髮變到疏落，甚至出現「大笪地」禿斑，患處通常會伴隨紅腫。
- 散發強烈異味
細菌或黴菌會破壞皮膚油脂平衡，喺短時間內散發出陣陣油臭味或者噏味。
- 性格同行為改變
皮膚唔舒服會令主子好煩躁，瞓覺都瞓得唔安樂，甚至變到無乜耐性。
狗狗皮膚病種類有邊啲？成因係咩？
種類 1：黴菌（真菌）感染
狗狗濃厚嘅毛髮配埋香港濕熱氣候，簡直係黴菌嘅溫床，特別係免疫力低嘅主子最易中招。受感染位置會反覆發炎、起皮屑，皮膚仲會慢慢變厚或者發黑。
種類 2：趾間炎（爛腳趾）
如果你發現主子係咁舔腳、腳趾罅紅腫，甚至行路一拐一拐，好大機會係趾間炎。通常係因為散步後腳掌無抹乾、長期處於潮濕環境或者過敏引致。
種類 3：脂漏性皮膚炎
當皮膚油脂分泌失調，就會變到好油膩，有黃灰色鱗屑同好大陣味。西施、巴哥等犬種因為基因關係會較易有呢類問題。
種類 4：異位性皮膚炎（濕疹）
主子會瘋狂抓癢，皮膚出現紅斑，好發喺腳掌、面部同腋下。成因複雜，通常同遺傳、環境致敏原（如塵蟎）或者免疫系統失調有關。
種類 5：過敏性皮膚炎
對特定嘢食（如牛肉、小麥）或者環境（如花粉）過敏。皮膚會出現小水泡、紅腫，嚴重會抓到流血。
種類 6：毛囊蟲感染
當狗狗抵抗力下降，原本潛伏喺毛囊嘅蟎蟲就會大量增生，導致眼周、口鼻周圍脫毛發炎。
狗狗皮膚病會傳染嗎？會唔會傳染畀人？
答案係：視乎種類！
如果是真菌（金錢癬）、跳蚤、疥癬蟲等引致，係會喺狗與狗、甚至人畜之間互相傳染嘅。家長照護前後一定要徹底洗手。如果係遺傳、過敏或內分泌引起嘅，就唔會傳染。
狗狗皮膚病點算好？會自己好返嗎？
（一）常見治療方式
- 外用藥膏：抗生素、抗真菌藥膏或者類固醇。
- 口服藥物：治療感染嘅藥物或減輕過敏嘅抗組織胺。
- 滴劑：針對跳蚤、蜱蟲引起嘅皮膚問題。
- 藥浴：用洗毛水治療，但唔建議長期用，廢事破壞皮膚天然屏障。
（二）點解皮膚病成日醫唔好？
如果主子皮膚病反反覆覆，通常同呢啲原因有關：未搵出根本致敏原、見好咗少少就擅自停藥（未斷尾）、主子本身抵抗力太差、或者單位環境太潮濕污糟。
延伸閱讀：【常見疾病】寄生蟲感染全拆解
點樣改善狗狗皮膚病？食咩好？
1. 保持衞生習慣
定期用溫和洗毛水沖涼，徹底吹乾毛髮；每日梳毛預防打結；定期清洗狗窩同玩具。
2. 避開致敏原
配合空氣清新機，散步避開花叢，並嘗試透過排除法搵出主子對邊種蛋白質過敏。
3. 改善飲食、補充足夠營養
- Omega-3（魚油）：維持皮膚健康，令毛髮亮麗，仲可以抗發炎。
- 維他命 E：超強抗氧化，保護皮膚細胞。
- 鋅：幫手合成皮膚蛋白質，提升免疫力。
- 卵磷脂：令毛髮更有光澤，幫助修復受損肌膚。
汪喵星球，始終以毛孩為本
我哋相信，毛孩就同小朋友一樣，值得擁有最好嘅選擇。汪喵星球由主食、零食到保健品，始終以毛孩需求為出發點，陪住你同主子一齊健康咁慢慢變老！
參考資料
