主子可以獨留單位幾耐？一文睇清成貓、幼貓及老貓嘅單獨留家注意事項

每當要出差、去旅行或者返鄉下，貓奴總會諗：「貓咪自己喺單位得唔得？」、「主子自己一個留喺屋企幾日會唔會好悶？」雖然相比起狗狗，貓咪相對獨立，但佢哋對剷屎官嘅依賴可能超過你想像呀！

貓咪可以獨自留喺屋企幾耐？單獨留超過一日可以嗎？邊啲情況絕對唔建議超過 24 小時？出門前要做好邊啲準備？汪喵話你知貓奴外出必睇注意事項！

貓奴行開太耐，主子係會感到悶同寂寞㗎。

雖然貓咪平時總係一副懶理你嘅樣，但根據研究指出，喺正常情況下，貓咪對家長係有情感連結同依賴嘅，有剷屎官陪住，貓咪會感到更安心同有安全感。

所以當家長唔喺度或者離開太耐，貓咪好大機會會感到無聊甚至有壓力。呢啲情緒壓力可能會引發主子拆屋、隨處便溺或者出現健康問題。所以出遠門前做好萬全準備，對主子嚟講好重要！

延伸閱讀：貓咪焦慮點算好？行為訓練師教你 3 步驟正確減壓

一般嚟講，喺糧同水充足、貓砂盆乾淨嘅情況下，成貓可以單獨留喺單位超過 24 小時（視乎貓咪性格），但不建議超過兩晚。除咗貓砂盆會變臭、糧水唔新鮮之外，主子亦可能因為太耐無見你而感到壓力，導致冇胃口、唔肯上廁所或者肚痾。

3 – 6 個月大嘅幼貓平均每 4 – 6 個鐘就要餵一次，加上佢哋精力旺盛，冇人睇住好易喺屋企跑跳受傷或者整壞嘢；老貓就對環境變化特別敏感，貓奴唔喺度好易引發身體不適。一旦有急病冇人及時處理，後果可以好嚴重。

結論：成貓最多留兩日；幼貓同老貓絕對唔好留超過 24 小時。如果有需要，記得搵熟悉嘅朋友、專業寵物保姆或者送去寵物酒店照顧。

延伸閱讀：自動餵食器好用嗎？自動、手動款式優缺點比較

1. 準備乾主食（凍乾/乾糧）

長時間唔喺屋企，建議餵乾主食（例如凍乾、乾糧），因為濕糧擺太耐會變壞滋生細菌。就算有自動機，都要喺普通糧碗放定份量做後備，以防停電。

可以將糧分配落唔同嘅藏食玩具，擺喺單位各個角落，等主子玩「搵食遊戲」解悶。

2. 到處擺放水碗
除了飲水機，出門前記得喺貓咪常經之路擺多幾碗乾淨水，確保就算部機壞咗或者主子玩到倒轉咗一碗，都仲有其他水飲。

出門前清理好砂盆，補足貓砂。如果去超過兩日，建議多準備一兩個貓砂盆，廢事因為砂盆太污糟搞到主子憋尿或者喺床單周圍屙。

1. 藥物、精油及香氛：呢啲嘢一旦打爛或者誤食會造成中毒。一定要鎖入櫥櫃。
2. 封鎖危險空間：廚房、廁所等有清潔劑或重要電器嘅房建議閂門。識開門嘅主子記得要加安全鎖。

準備主子可以自己玩嘅嘢，分散注意力：

 
• 紙箱、貓抓板

 

• 貓薄荷玩具、藏食玩具

如果外出超過兩日，強烈建議搵朋友或者專業寵物保姆每日上門探訪一次。除咗餵食同鏟屎，最重要係確保主子安全，就算佢驚生保人匿埋咗，至少都有人確保個環境正常。如果情況唔允許，建議送去信任嘅寵物酒店。

做好以上清單準備，主子喺單位就可以過得自在啲，你喺出面亦可以放心去玩或者專心工作啦！

我哋相信，毛孩就同小朋友一樣，值得擁有最好嘅選擇。

因此，我哋始終以毛孩嘅需求為出發點，由主食、零食、保健品到貓砂，持續打造極致、提供貼近需求嘅產品，帶畀佢哋幸福又健康嘅生活。陪伴我哋一齊慢慢變老！

 
• Inverse – How long can cats be left alone?

 

• Rover – Leaving a cat alone for the first time

 

• GreatPetCare – Avoid these when leaving your cat alone