各位貓奴狗奴一定都有被毛孩用「貓拳」、「狗拳」招待過嘅經驗！但你知唔知？其實貓狗嘅爪同牙齒上面收埋咗好多細菌！咁樣被貓咪狗狗抓傷或者咬親到底點算好？係咪一定要打破傷風針？除咗小心破傷風之外，仲有咩要留意？一齊嚟睇吓關於破傷風嘅小知識，希望幫到各位主人喺遇到突發狀況嗰陣可以更從容應對！
乜嘢係「破傷風」？
破傷風（Tetanus/Lockjaw）係由破傷風桿菌引起嘅傳染病。破傷風桿菌會經由開放性傷口進入人體，主要原因包括被犬貓咬傷所造成嘅深層穿刺傷口、被生鏽尖銳物割傷，或者傷口接觸到受污染嘅泥土等。
破傷風桿菌入侵體內之後會產生毒素影響神經系統，導致肌肉無法正常收縮。感染破傷風嘅常見徵狀係腹部僵硬同肌肉痙攣，同時可能伴隨肌肉抽搐、收縮疼痛、吞嚥困難、發燒等，嚴重嘅話會導致神經性併發症甚至死亡。
相對於人類，貓狗感染破傷風嘅個案比較少，但如果毛孩本身有外傷或者啱啱做完手術，依然有機會中招。常見徵狀係傷口周圍肌肉僵硬、痙攣（局部性破傷風），嚴重嘅話會出現全身性肌肉僵硬，令四肢彎唔到、行路困難。
被抓咬之後，一定要打破傷風針嗎？
答案係：唔一定！一旦被抓咬，醫生通常會先評估「傷口深淺」同埋「疫苗接種史」。如果傷口好深而且有感染風險，就應該去醫院或者診所打破傷風針。醫護人員會問你上一次打破傷風針係幾時，如果唔肯定或者已經超過 10 年，身體可能已經無晒抗體，通常會注射治療型嘅 TIG（免疫球蛋白）或 TAT（抗毒素）嚟中和毒素，再配埋疫苗嚟產生長期抗體。
破傷風嘅免疫製劑主要分兩種：
1. 預防性破傷風注射（疫苗）：由破傷風類毒素組成，令身體主動產生抗體。例如香港細路仔出世後接種嘅「六合一」或「四合一」混合疫苗。通常呢啲疫苗效力大約 10 年。如果你嘅工作需要成日接觸泥土、污染物或者動物，建議每 10 年追加接種一次。
2. 治療性破傷風注射：由破傷風免疫球蛋白（TIG）或抗毒素（TAT）組成，主要係喺傷口有高度感染風險時即時注射，可以迅速中和毒素。
雖然我哋細個都有打過齊疫苗，但大個咗好少會主動去補打。所以建議如果被毛孩抓咬到見紅、傷口深，最好都係去搵醫生評估吓，降低感染風險呀！
打破傷風針要去大醫院嗎？幾錢度？
唔一定要去急症室，其實普通私家診所或者專科診所都可以打到。大家去之前可以先致電問吓診所係咪有備存疫苗。喺香港私家診所打一針破傷風疫苗，價格大約由港幣 300 至 800 元不等（視乎診金及藥費）。
只要做好預防工作，受傷後盡快清潔傷口同接受適當治療，其實痊癒機會係好高嘅，主人唔使過份恐慌！
被抓傷/咬傷仲要留意啲乜？
除咗破傷風，如果被貓狗或者野外動物抓咬傷，仲要留意有無感染狂犬病或者貓抓病嘅可能。雖然香港已經好耐無本地狂犬病個案，但對陌生動物依然要保持警覺。而「貓抓病」就係貓奴最容易忽略嘅問題。
乜嘢係「貓抓病」？
貓抓病係由一種叫巴通氏菌 (Bartonella henselae) 嘅細菌引起。呢種菌主要宿主係貓，透過跳蚤喺貓同貓之間傳染。如果人被帶菌嘅貓舔到傷口、咬傷、抓傷，或者被帶菌嘅跳蚤咬到，就有機會中招。
值得留意嘅係，大部分貓狗感染咗之後都無明顯徵狀，所以就算隻貓睇落好健康，被抓傷都唔可以掉以輕心。小朋友、老人家或者免疫力低嘅人士比較容易被感染，徵狀包括發燒、冇胃口、身體虛弱，傷口附近可能會有淋巴結腫大或者紅疹。
雖然貓抓病目前無疫苗，但好彩大部分免疫力正常嘅人喺感染後徵狀唔算嚴重，局部性感染通常 2 至 3 個月內會自主痊癒。但如果出現全身性徵狀，就有機會影響神經系統，一定要即刻求醫。
總結
無論係貓抓病定破傷風，最重要都係預防。最簡單嘅方法係唔好隨便騷擾陌生動物，定期幫家中毛孩做足杜蟲、除蚤工作，減少佢哋接觸病原嘅機會。
總括嚟講，呢啲疾病可大可小。毛拔麻如果不小心被抓咬傷，記得盡快用清水同肥皂清洗傷口，然後用酒精或碘酒消毒。之後密切觀察傷口有無紅腫發熱或者上述徵狀，有懷疑就快啲去睇醫生啦！
本文參考資料：
Tetanus Q&A information about the disease and vaccines：https://www.immunize.org/catg.d/p4220.pdf
NCBI Clostridium Tetani：https://www.ncbi.nlm.nih.gov/books/NBK482484/
VCA Tetanus in Cats ：https://vcahospitals.com/know-your-pet/tetanus-in-cats
VCA Tetanus in Dogs：https://vcahospitals.com/know-your-pet/tetanus-in-dogs
衛生署衞生防護中心：破傷風資訊頁面
