貓薄荷係咩嚟？由植物到成份完整介紹！
貓薄荷（Catnip），學名 Nepeta cataria，屬於薄荷科荊芥屬，係一種多年生草本植物，深受主子們喜愛。
佢嘅核心活性成份係荊芥內酯（nepetalactone），係一種天然揮發油。當貓咪接觸到佢嘅時候，會刺激神經系統，產生各種令人啼笑皆非嘅行為反應。
貓薄荷嘅味道同作用原理！
當貓咪磨蹭、咬或者舔呢類植物嗰陣，就會釋放出荊芥內酯，陣味有啲似淡淡嘅檸檬薄荷香。
呢種氣味會同貓咪鼻腔入面嘅特殊受體結合，進一步刺激大腦入面負責情緒同行為嘅區域。有研究指出，貓咪係透過「犁鼻器」（vomeronasal gland）嚟感知呢類「神仙氣味」㗎。
貓薄荷、一般薄荷同貓草有咩分別？
（一）同一般薄荷嘅分別
平時我哋食嘅薄荷屬於薄荷屬，唔含荊芥內酯。其實大部份貓咪都唔鍾意薄荷嗰種太強烈嘅清涼感，甚至會覺得反感。
（二）同貓草嘅分別
貓薄荷嘅功效同好處！
貓薄荷會令貓咪出現磨蹭、打滾、瘋狂咬嘢、大聲叫、周屋衝甚至短暫嘅「攻擊」行為。呢啲反應通常維持 5 到 15 分鐘就會完，之後主子會進入大約 1 個鐘嘅「聖人模式」（反應休眠期）。
常見功效包括：
- 幫主子放鬆心情、減壓（紓壓）
- 增加玩味，令主子多啲郁動
- 協助適應新環境（例如搬屋、睇獸醫）
- 作為訓練工具（例如搽喺新買嘅抓板度）
提提大家：聞通常會令貓興奮，食落肚反而可能會有鎮靜放鬆嘅效果。
「貓界大麻」有副作用嗎？會唔會上癮？
好多貓奴會問：貓薄荷對貓有害嗎？其實貓薄荷係非常安全嘅，而且完全唔會上癮。雖然被戲稱為「貓界大麻」，但主子喺 High 緊嗰陣其實係清醒嘅，而且大部份貓都會自我節制，唔會過量。
不過，如果主子「貪心」食得太多（尤其係直接吞粉末），可能會導致腸胃唔舒服，例如嘔吐、拉肚子，或者出現短暫頭暈、行路唔穩等徵狀。
千祈唔好忽視：懷孕母貓、體弱、年老，或者有心臟、呼吸道疾病嘅貓咪，應該避免接觸貓薄荷，費事引發身體不適。
貓薄荷點樣餵？幾耐食一次？
（一）常見形式
乾葉片、粉末、新鮮盆栽、精油噴霧、填充玩具。
（二）使用方法
可以灑喺玩具、貓抓板或者床位。想方便啲唔使清潔粉末，可以用噴霧噴喺主子鍾意嘅地方。
（三）使用份量
每次大約 1 茶匙就夠。新鮮貓薄荷力道比較勁，建議酌量畀主子試咗先。食太多好易出事，搞到腸胃不適或者頭暈暈。
（四）使用頻率
每星期 1 至 2 次最理想，費事主子玩慣咗之後產生耐受性（麻木），變得無晒反應。
幾多歲先食得？幼貓可以玩嗎？
細貓對貓薄荷通常係「無感」嘅。建議等到主子超過 6 個月大再試，嗰陣佢哋嘅神經系統發育得比較成熟，先會體會到貓薄荷嘅快樂。
貓薄荷常見 Q&A！
Q1：點解我隻貓對貓薄荷完全無反應？
A：大約有 30% – 50% 嘅貓係天生對貓薄荷無感嘅，呢個純粹係基因遺傳問題，主人唔使擔心。
Q2：狗狗可以玩/食貓薄荷嗎？
A：狗狗聞或者接觸到貓薄荷係安全嘅，可能有啲放鬆效果，但佢哋絕對唔會好似貓咁 High 到打冷震。
Q3：人食唔食得貓薄荷？
A：人係食得嘅（通常係用嚟浸茶），有助放鬆助眠、緩解胃部不適，但你飲完係唔會變成「貓」㗎。
