結石係貓咪好常見嘅泌尿疾病。當貓咪突然亂尿尿、頻繁進出砂盆甚至發現血尿，就要小心可能係泌尿道結石搵上門！邊啲貓咪係結石高風險族群？應該點樣預防同治療？
汪喵邀請 專業獸醫師－高旗 分享『貓咪泌尿道結石』嘅治療與照護指南
GiGi 係隻超親人嘅黑貓，成日製造『路倒』事件強迫經過嘅人摸摸。點知有一日，媽媽突然發現貓砂盆有一大泡血尿！
仔細回想，GiGi 最近上廁所嘅姿勢好似怪怪哋，蹲廁所亦都特別耐，間中仲會傳出奇怪嘅叫聲。媽媽即刻帶 GiGi 去睇獸醫，影咗 X 光之後發現膀胱有幾粒白色嘅嘢…
『原來係膀胱結石喺度搞搞震！』
點解會泌尿道結石？常見徵狀有邊啲？
成因：尿液濃度、酸鹼值
結石有唔同種類，成因亦有分別，但簡單嚟講係同尿液濃度同埋酸鹼值（pH 值）有關，呢啲因素會利於結晶生成。
➤ 尿液濃度飽和
以草酸鈣結石為例，當尿液入面嘅鈣離子同草酸根離子濃度達到飽和，就容易產生結晶。結晶聚集埋一齊，或者碰到其他物質（如縫線、血塊等），就會吸引更多結晶聚集，最後形成結石。
➤ 尿液酸鹼值異常
以磷酸銨鎂（Struvite）結石為例，除咗濃度飽和外，感染泌尿道嘅細菌會令尿液變鹼性，令結晶更易產生。例如狗狗嘅磷酸銨鎂結石，通常都同細菌感染導致尿液變鹼有關。
常見徵狀：排尿行為異常
結石產生之後，會刺激泌尿道黏膜發炎、出血。貓咪最常見嘅結石徵狀包括血尿、頻尿、亂尿尿、排尿痛楚或困難等。如果泌尿道完全塞咗，仲會導致冇精神、冇胃口、甚至嘔吐。
結石種類咁多，形成原因大唔同！
貓狗常見嘅結石分為五種：磷酸銨鎂（Struvite）、草酸鈣（Calcium oxalate）、尿酸（Urate）、半胱胺酸（Cysteine）同矽酸鹽（Silicate）。其中以磷酸銨鎂同草酸鈣最常見。
五種結石嘅成因都唔同，特定結石可能同先天代謝異常或飲食有關，唔同位置好發嘅種類都唔一樣。例如貓咪腎臟常見草酸鈣結石；膀胱就兩種都好常見。
唔同品種同埋年齡好發嘅種類亦有分別，例如年輕貓咪常見磷酸銨鎂結石；老貓就比較常見草酸鈣結石。
泌尿道結石診斷：影像同驗尿三管齊下
因為種類繁多，要準確診斷結石，通常需要同時做 X 光、超聲波同埋驗尿，先可以做到最完整嘅評估。
Step 1. X 光檢查
X 光可以睇到結石嘅數量、大細、形狀同位置，幫助「預測」種類。但有啲結石喺 X 光下唔明顯，如果太細粒亦未必睇到，而且較難評估有無併發症，好似水腎或膀胱發炎咁。
Step 2. 超聲波檢查
超聲波可以睇到 X 光影唔清楚嘅結晶或者沙粒狀結石，提早發現結石生成。同時亦可以評估有無併發症，例如尿道阻塞。喺超聲波輔助下，仲可以抽取尿液樣本去做細菌培養。
Step 3. 尿液檢查
驗尿可以了解 pH 值、比重、微量元素含量，亦可以檢查有無蛋白尿或者血球。尿渣檢查就可以睇到有無細菌或者結晶。
呢啲線索幫獸醫鎖定結石種類去醫治；細菌培養就係要診斷有無細菌感染，決定用邊種抗生素，避免惡性循環。
如果懷疑成因唔單純，仲需要配合驗血去排除其他疾病，例如高血鈣。
『雖然可以預測結石種類，但如果要 100% 肯定，始終要攞粒結石出嚟做分析。』
杜絕貓咪結石：預防勝於治療！
結石治療需要根據種類同埋位置而定：
首要預防：增加水分攝取
增加飲水量可以稀釋尿液濃度，避免過飽和。濕食（如主食罐）含水量高，對增加飲水量好有幫助。雖然結石成因好複雜，但「飲多啲水」絕對係無錯嘅方向！
延伸閱讀：主子飲夠水未？毛孩每日飲水量計算機
食物離子濃度要適中
鈣、磷、鎂離子比例太高會增加結石風險。但要注意，呢啲離子唔係越少越好，而係要保持喺適當範圍內。除咗呢啲，蛋白質同鈉離子含量都要留意！
尿液酸鹼值（pH 值）
研究話偏酸性尿易產生草酸鈣結石，但其實正常尿液 pH 值本身就有一個範圍。要注意抑制某種結石嘅成分，可能會引發另一種結石，所以唔可以單靠調整 pH 值去預防。
泌尿道結石居家照護
如果你家貓咪有結石病史
食物營養好複雜，好難單靠調整一種成分就成功。有病史嘅貓咪，建議增加飲水量，並搭配專門嘅處方糧嚟減少復發！
未有結石但屬於高風險族群
肥胖或者高風險品種可以食一般主食，但日常一定要飲夠水，留意有無排尿異常，同埋定期去做體檢。
聽完醫生解釋，媽媽推測 GiGi 最有可能係無法溶解嘅草酸鈣結石，決定做內視鏡手術攞出結石，並開始轉食處方食品同加強補水…
泌尿結石處理好複雜，需要主人、主子同獸醫一齊努力。只要細心照料，主子一定可以遠離痛楚！
貓奴可能仲想睇：
延伸閱讀：貓咪容易驚驚？小心引起自發性膀胱炎
延伸閱讀：由砂盆到貓砂，行為訓練師教你打造完美主子廁所
