點解貓咪會膀胱炎？竟然係因為壓力太大？
喺臨床上，所有出現頻尿、血尿、排尿困難、或者排尿行為異常嘅徵狀，都被統稱為「貓下泌尿道疾病」（Feline lower urinary tract disease, FLUTD）。其中，自發性膀胱炎（feline idiopathic cystitis, FIC）同埋尿道結石（Urolithiasis）係最常見嘅病因。
根據統計，出現泌尿道問題嘅貓咪入面，超過 50 – 60% 係因為「壓力（Stress）」呢個大魔王而引起嘅「自發性膀胱炎」，係一種同時由生理同心理問題互相影響而成嘅疾病。
延伸閱讀：【犬貓常見疾病】貓下泌尿道疾病全攻略
延伸閱讀：主子頻尿、血尿？拆解貓泌尿道結石成因、治療及預防照護！
貓膀胱炎有咩徵狀？小心排尿異常！
貓自發性膀胱炎係因為「壓力」引發「交感神經活動增加」，令到膀胱入面嘅痛覺神經變得好敏感，引起一連串神經內分泌系統嘅變化，改變咗泌尿上皮嘅滲透能力。
最後，呢啲變化會導致膀胱黏膜上皮受損發炎，出現好似血尿、排尿痛楚或困難、排尿行為異常（例如周圍尿）、頻繁舔下體等徵狀。
由於自發性膀胱炎唔係一日形成，加上主子好叻隱藏唔舒服，當剷屎官發現徵狀嗰陣，代表毛孩已經累積咗一段時間嘅壓力喇！
延伸閱讀：貓咪尿尿有血點算好？3 大貓血尿原因、照護及預防重點
貓膀胱炎 6 大致壓原因
因為我哋無辦法完全知主子諗緊咩，所以更需要搵出令佢哋壓力大嘅因素。首先要確保屋企有足夠生存資源，包括食物、水、貓砂盆呢三部分。
其他常見嘅壓力來源包括：
1. 搬屋、裝修或郁動傢俬位置
2. 有新家人或寵物加入、或者原本嘅同伴離開
3. 屋企人嘅生活作息突然改變
4. 屋企成日有生保人探訪
5. 劇烈天氣變化（例如成日落大雨、行雷）
6. 附近有大聲嘅裝修或施工噪音
貓膀胱炎 3 類風險族群
貓自發性膀胱炎成日會同其他泌尿系統疾病混淆，搵出風險因素，可以幫獸醫更準確咁診斷：
| 身體因素 | 環境因素 | 營養因素 |
|
|
|
貓膀胱炎點樣醫？幾耐先會好？
貓自發性膀胱炎會嚴重影響生活質素，建議即刻帶去獸醫診所診斷，咁先可以確保主子得到專業治療、及早康復。
● 泌尿道完全阻塞與急性腎損傷
如果尿道完全塞晒或者腎臟受損，要即刻放導尿管或者做膀胱穿刺，先可以排走積尿、減輕膀胱壓力。
● 尚未完全阻塞
如果仲可以排尿，可以先以改善環境、內科治療（主要係用止痛藥物）為主。
每隻貓嘅情況都唔同，康復時間亦會因貓而異呀！
貓咪膀胱炎居家照護指南！
（一）飲食
- 攝取充足水分：建議轉食濕糧（主食罐、鮮食、生食）。
- 保護膀胱內膜：可以補充糖胺聚醣（GAG）。
- 緩解緊張情緒：補充色胺酸（Tryptophan）、維他命 B6。
（二）環境
由貓砂盆做起，準備「貓口 + 1」嘅砂盆數量，擺喺易去到、通風、有隱私嘅位。另外，準備紓壓玩具、確保糧碗同水碗乾淨都好緊要！
貓自發性膀胱炎係一個極之難搞嘅病，因為佢嘅徵狀同結石、細菌感染好相似。由於呢個病同「壓力」息息相關，所以環境調整、營養支援同止痛治療先係重點。
呢場病需要剷屎官同獸醫密切配合、長期作戰。好彩嘅係，隨住年紀增長，復發機會通常會慢慢下降。只要用啱方法陪伴，主子就可以開開心心陪我哋好耐好耐！
