本文用詞遵循寵物食品相關規範審慎調整，盡可能清楚傳達資訊嘅同時，避免使用可能產生誤解嘅詞語，感謝各位家長嘅體諒同理解！
貓咪突然變瘦咗！體重跌幾多先算唔正常？
每日同主子朝夕相處，如果發現佢食量無變但就越嚟越瘦，相信各位家長心入面都會好疑惑同緊張。到底主子身體發生咗咩事？
你可以幫主子量吓體重，如果下降比例超過 10%，而且摸到骨頭形狀好突出、皮膚鬆弛暗沉，或者條腰明顯變幼無晒脂肪，咁就一定要非常小心，代表主子嘅健康已經亮起紅燈，更有可能有慢性疾病嘅風險！
點解貓咪會變瘦？5 種原因唔可以忽視！
（一）嚴重挑食（嘴刁）
有啲主子對嘢食非常挑剔，可能因為佢哋特別偏好某啲口味或者質地。如果任由佢哋「嘴刁」落去，好易會導致營養攝取不足，進而令體重下跌。
建議家長可以試吓逐步改變主子嘅飲食習慣，嘗試唔同品牌或口味嘅罐罐同乾糧，嚟提高佢哋嘅食慾。
（二）食飯經常被干擾
當主子食飯嗰陣，如果屋企其他寵物會行埋嚟搶食，或者進食環境太嘈雜、唔夠隱蔽，都可能令主子壓力大到唔想食，甚至乾脆放棄進食！
如果有呢種情況，可以另外劃出一個安靜、安全嘅進食空間，等主子可以放鬆心情專心享用美食。
（三）壓力和憂鬱
貓咪係好敏感嘅動物，環境變遷（如搬屋）、有新成員加入、甚至係新寵物入屋，都可能令佢哋感到不安，間接影響食慾。
建議留意主子嘅行為變化，並試吓營造一個穩定、舒適嘅用餐環境，畀足安全感佢，先可以提高進食慾望。
（四）營養吸收不良
主子變瘦，亦可能係腸胃出咗問題，令佢哋無論食幾多都無法有效吸收所需營養。如果懷疑有吸收不良問題，建議及時去診所搵獸醫檢查，攞到專業嘅診斷同治療建議。
（五）疼痛影響進食
如果主子感到身體唔舒服，無論係口腔潰瘍（口炎）、關節痛，定係器官衰竭，都可能因為痛得太犀利而對食物失去興趣。
家長要密切觀察主子日常，留意有無異常跡象，有任何唔妥都必須警覺，呢啲隨時係潛在疾病嘅徵兆！
貓咪變瘦暗藏危機？5 大代表疾病要注意！
（一）癌症
當貓咪患有癌症、體內出現腫瘤嗰陣，會大量消耗營養，令佢哋容易感到攰同無力，亦會引致食慾下降、吸收不良，令體重急速減輕。
（二）腎臟病
隨住腎功能衰退，主子身體無法正常吸收營養，並常伴隨「飲多尿多」嘅徵狀。水分同營養快速流失會令主子好快消瘦，「體重下跌」亦係判斷腎病嘅重要指標之一。
（三）糖尿病
貓咪糖尿病同人一樣，即使食得正常，仍然無法有效利用葡萄糖作為能量，令主子越嚟越瘦，同時會有口渴同排尿頻繁嘅情況，家長要特別注意！
（四）腸道寄生蟲
如果主子腸道有寄生蟲，唔單止會造成感染，仲會搶走晒主子所需嘅能量同營養。所以定期幫貓咪杜蟲（驅蟲）係非常重要㗎！
（五）甲狀腺功能亢進 (甲亢)
甲亢係老年貓常見嘅內分泌疾病，會令新陳代謝過快。患有甲亢嘅主子通常會「食極唔肥」，甚至食好多體重都仍會雪崩式下滑，身形變到好似皮包骨咁。
主子變瘦點算好？出現 5 徵狀請即求醫！
總結嚟講，導致貓咪變瘦嘅因素好多。家長可以先觀察有無潛在原因（如環境壓力或嘴刁），並試吓幫主子排除困難。
但如果主子有不明原因體重持續下降，仲出現埋冇胃口、體態劇變、嘔吐或肚屙，請務必立即搵獸醫求助，搵出背後病因並提供即時治療！
參考資料
- PetMD – Cat Losing Weight: Causes, Symptoms, and Treatment
- BetterVet – Why Is My Cat Losing Weight?
- VCA Hospitals – Weight Loss in Cats
