貓咪鉀離子過低會無晒力？貓低血鉀徵狀有邊啲？
主子變到懶洋洋？小心鉀離子過低！鉀離子係一種電解質，幫手維持身體系統正常運作，對貓咪健康好重要。如果血液入面嘅鉀離子含量太低，就會影響神經、肌肉同心臟功能，最明顯嘅表現就係全身肌肉無力（心臟都有心肌㗎，一樣會受影響）。
另外，腎臟係維持電解質平衡嘅主要器官，負責過濾血液入面多餘嘅鉀離子。如果鉀離子含量異常，亦可能係腎臟發出嘅警號。
（一）常見嘅貓咪低血鉀徵狀
- 昏睡、冇精神
- 嘔吐
- 肌肉無力（手軟腳軟）
- 心律不正
- 呼吸困難
- 頸部低垂（無力抬頭）
- 冇胃口、食慾不振
- 企唔穩、行路困難
- 飲多尿多
（二）貓鉀離子數值正常係幾多？點先算過高？
正常嘅鉀離子數值大約係 3.5 至 5.1 mmol/L（參考範圍因應唔同診所嘅儀器而有分別）。好多因素都會影響數值，如果見到數值有啲起伏，各位剷屎官都唔使過分恐慌，建議請獸醫根據主子嘅體質同生理狀況做專業評估。
無論係低血鉀定高血鉀，對貓咪嚟講都係負擔。常見嘅貓咪高血鉀徵狀包括：
- 極度嗜睡
- 不由自主嘅肌肉抽搐
6 大常見嘅貓咪低血鉀成因
造成低血鉀嘅因素好多，建議一定要搵獸醫做詳細檢查診斷。常見原因包括：
● 消化道流失：因為消化液含有大量鉀離子，如果主子嚴重嘔吐或者肚痾，就會導致低血鉀。
● 腎功能喪失：腎功能不全會令過多嘅鉀離子隨尿液排出體外。
● 醫源性問題：服用利尿劑會令鉀離子流失；長期打皮下水或注射胰島素亦可能引起，特別係患有糖尿病酮酸中毒嘅貓咪要加倍留意。
● 中毒：誤服沙丁胺醇（Albuterol，常見於哮喘藥）會引致低血鉀。
● 代謝性鹼中毒：鹼血症會刺激腎臟排走更多鉀離子。
● 遺傳因素：研究顯示，歐洲同澳洲嘅緬甸貓（Burmese）較易患有遺傳性低鉀性週期性麻痺症。
想幫主子護好腎？由食得健康開始：汪喵星球低磷罐系列
獸醫點樣診斷貓咪有無低血鉀症？
診斷低血鉀症嘅過程比較複雜，需要配合臨床檢查、體質評估同驗血報告。家長如果發現主子唔妥，要即刻帶佢去專業獸醫診所驗身，千祈唔好自己斷症，廢事延誤病情！
睇醫生嗰陣，可以主動同醫生說明以下情況：
- 主子係咪對嘢食失去興趣、唔肯食嘢
- 四肢係咪有氣無力、甚至企唔穩
- 飲水量同排尿次數係咪多過平時
- 有無嘔吐過（就算只係偶爾嘔都要講）
貓咪補鉀食物有邊啲？5 種食材推薦
如果獸醫建議需要增加鉀質攝取，可以參考以下天然食材：
鉀質存在喺好多天然肉類同蔬果入面，例如雞肉、羊肉、三文魚、南瓜、香蕉。但係要注意，香蕉雖然高鉀，但碳水化合物亦都好高，唔建議大量餵食。
特別提醒：如果主子同時患有心臟病或腎臟病，雖然呢啲食物富含鉀離子，但對病情未必適合（例如腎病貓要限制磷質）。所以喺調整飲食前，一定要請獸醫根據主子最新嘅體檢報告嚟做綜合評估呀！
參考資料
- Fluid, Electrolyte, and Acid-Base Disorders in Small Animal Practice. 4th ed.
- Today’s Veterinary Practice – Evaluation and Management of the Hypokalemic Patient
- International Cat Care (iCatCare) – Hypokalaemia
- PetMD – Hypokalemia in Cats
