出遠門嗰陣，可以由得主子餓一日或者少食一餐嗎？貓咪餓親肚仔，除咗會狂喵叫之外，對健康仲有咩影響？胖貓減肥，係咪可以唔食嘢？答案係絕對唔得！因為貓咪餓得太耐，好容易會引發致命嘅「脂肪肝」風險。到底乜嘢係貓脂肪肝？有咩常見徵狀同點樣預防？一齊嚟深入了解啦！
乜嘢係貓脂肪肝？
脂肪肝係貓咪肝臟疾病入面極之常見嘅一種，而且屬於「食因性」嘅營養疾病。成因係過多脂肪喺肝臟入面形成阻塞，令到肝臟停工，無法正常運作。
基本上，如果主子符合「過肥」同「長時間無進食」呢兩大關鍵點，就要極之小心會患上脂肪肝。因為貓係絕對肉食動物，對蛋白質需求極高。一旦開始捱餓、攝取唔到足夠蛋白質，體內儲存嘅脂肪就會大量分解釋放，但肝臟無辦法有效將呢啲脂肪轉化成能量，結果全部堆積喺肝臟，最終導致肝功能衰竭。
常見徵狀
- 長時間唔肯食嘢、食慾明顯變差
- 皮膚、眼白、耳仔變黃（即係俗稱嘅「黃疸」）
- 無厘精神、嘔吐、肚屙等
- 出現脫水跡象、體重無端端急跌
如果主子超過 24 小時無食嘢，仲伴隨住以上徵狀，建議即刻帶去診所搵獸醫。醫生通常會透過驗血（睇肝指數有無爆升）或者驗尿（睇有無膽紅素尿）嚟斷症。
治療與預防
正如上面提到，脂肪肝嘅兩大關鍵係「肥胖」同「長時間無食嘢」。所以除咗舒緩嘔、屙等徵狀外，首要任務就係「令主子肯食返嘢，並攝取足夠營養」。如果主子係因為其他病先唔肯食嘢，就要雙管齊下，一齊醫先至有機會斷尾。
脂肪肝雖然得人驚，但只要把握三大要點，就可以有效降低風險：
1. 千祈唔好餓親主子！
有啲家長出遠門，或者想幫主子減肥，會揀「斬腳趾避沙蟲」唔餵一兩餐。但貓嘅身體係頂唔順㗎！出街耐啲都建議搵親友幫手睇睇，或者請專業貓保母、送去貓旅館。就算真係要留佢喺屋企，都要留足夠嘅糧（不過要注意濕糧放太耐會變壞，家長要自己衡量）。
2. 避免高碳水化合物（高澱粉）食品
高碳水食品（例如部分乾糧）澱粉含量高，好易令貓變肥。選擇營養均衡、含肉量高嘅主食罐、生食餐或鮮食，可以令主子吸收足夠蛋白質，長肌肉而唔係長肥肉，遠離「肥貓」行列！
3. 主子唔食嘢？一定要搵出原因！
如果你發現主子胃口變差，一定要即刻查原因。除咗病痛之外，環境壓力（例如搬屋、有新貓入屋）都會令佢哋「罷食」。一旦發現主子唔食嘢，就要盡快改善環境或者睇醫生，令佢哋開返口。
總結
貓脂肪肝係一種同飲食習慣息息相關嘅病。除咗要養成良好餵食習慣（例如定時定量、唔好等佢餓親）之外，揀啱主食都好重要。畀絕對肉食嘅貓咪食少啲澱粉、多啲優質肉類，由飲食根本做起，先至係最慳心、最愛護主子嘅做法呀！
▸ 推薦閱讀：【健康百科】點樣知主子變肥咗？BCS 體態評估教你睇
