狗狗嘔到七彩、又屙到軟晒？好大機會係急性腸胃炎！造成狗狗腸胃炎嘅原因有好多，而且腸胃炎唔會無啦啦自己好。如果主子出現徵狀，一定要即刻帶去診所驗身，廢事延誤治療呀！狗狗腸胃炎幾耐先會好？徵狀有邊啲？腸胃炎期間可以食乜嘢？
狗狗點解會得腸胃炎？
狗狗難免會有肚仔唔舒服嘅時候，當腸道或者胃部發炎，就係我哋俗稱嘅腸胃炎。唔好以為食壞肚先會發炎，壓力大或者突然轉糧都會引起腸胃炎㗎！常見原因包括：
飲食改變
短時間內改變狗狗飲食，例如突然換糧（唔同牌子）、乾糧轉濕糧、熟食轉生肉糧等。腸胃一時適應唔到，就會造成狗狗腹痛或者肚屙。
不當飲食
包括餵食時間唔定、嘢食擺得太耐變質（尤其係鮮食同生肉）、誤食太油膩、難消化、具刺激性或者絕對唔食得嘅嘢（如人食嘅垃圾食物）。
環境或心理壓力
比較驚青或者容易緊張嘅狗狗，可能因為環境變遷（例如搬屋、新成員加入）或心理壓力，令身體長期處於緊繃狀態，進而引起腸胃道不適。
腸道寄生蟲或病毒感染
如果狗狗無定期杜蟲（驅蟲）嘅習慣，容易感染鞭蟲、絛蟲、蛔蟲等寄生蟲；若果無定期打預防針，就容易感染犬瘟熱、冠狀病毒、犬小病毒等，呢啲都會導致嚴重腸胃炎。
．狗狗寄生蟲危機！→ 延伸閱讀 ：常見迷思及杜蟲藥比較懶人包！
其他疾病併發
例如腹膜炎、胰臟炎、肝臟或腎臟疾病等，都有機會影響腸胃功能、併發出腸胃發炎嘅徵狀。
趴喺地拱起背唔係同你玩！狗腸胃炎主要徵狀
狗狗忍痛力好強又唔識講嘢，剷屎官要點知佢肚仔痛？最常見嘅徵狀係嘔同肚屙（腹瀉），如果出現以下徵狀就需要立即就醫治療：
腹痛
如果狗狗長時間將肚皮貼平喺冰涼嘅地下，或者出現拱起個背、做出「祈禱姿勢」（前腳伸直趴低，後半身企高），睇落好似想玩但又唔郁，仲聽到好大聲腸胃蠕動嘅「咕嚕」聲，狗狗好可能係肚痛緊！
肚屙（腹瀉）
便便呈現水狀稀軟、有黏液同強烈腥臭味，嚴重嗰陣會肚屙加劇甚至排血便。
嘔吐
可能會嘔出白色泡泡或者啡色未消化完嘅糧，若果肚入面無晒嘢，就會嘔出淡黃色膽汁，嚴重時嘔吐次數會變多。
發燒
長期嘔吐肚屙會導致脫水同發燒。徵狀包括鼻頭乾爭爭而且微熱、活動力下降甚至行路都唔穩。如果是病毒感染，發燒可能超過 40 度。
※腸胃炎徵狀同胰臟炎極之相似，家長通常好難分辨，一定要帶主子搵獸醫驗身！
．胰臟炎都會上吐下瀉！ 延伸閱讀：狗狗亂食嘢惹禍？胰臟炎診斷與治療
狗狗腸胃炎會自己好嗎？治療方式
腸胃炎唔會自己好！ —— 遲睇醫生仲嚴重
有啲家長會擅自叫狗狗禁食，或者畀人食嘅腸胃藥，但腸胃炎唔會多休息幾日就自己痊癒！各位剷屎官千祈唔好自行投藥，藥量或藥種唔啱反而會引發更嚴重病症，一定要食獸醫開嘅藥。
清理腸胃
輕症初期通常會有肚脹或者水便，獸醫會先畀消脹氣藥物緩解不適。
止瀉止嘔
獸醫會開消炎或抗生素藥物，緩解嘔吐肚屙徵狀。如果係寄生蟲引起，就會進行杜蟲（除蟲）療程。
靜脈輸液（吊點滴）
為咗避免脫水，醫生會幫狗狗補充鹽水同葡萄糖，視嚴重程度調整電解質，或者打維他命針做積極輔助治療。
※狗狗及時接受治療，通常一星期內就會痊癒。如果食藥後無好轉甚至更嚴重，要即刻帶佢回診呀！
狗狗腸胃炎食乜好？要唔要停食？注意三大飲食要點
要點 1、少量多餐
有助維護腸胃道機能，餵食頻率視乎徵狀嚴重程度而定。
要點 2、清淡且質地軟身嘅嘢食
例如剪碎嘅水煮雞胸肉，等狗狗腸胃容易進食兼休息。
要點 3、揀適口性高（好食）嘅糧
唔舒服嗰陣通常會冇乜胃口，揀肉味香啲、主子鍾意食嘅糧可以提高食慾。
唔使「禁食」！盡早補充營養先係好返嘅關鍵
研究顯示，早期畀足夠營養先係康復關鍵。嘔吐肚屙會導致脫水同流失電解質，引導狗狗進食補償營養先係最緊要。
點樣預防狗狗腸胃炎？
好多病都係由飲食不當引起，建立良好飲食習慣好重要。出街一定要繫好牽繩，防止主子亂執嘢食而病從口入！
良好飲食習慣
- 避免誤食：唔好畀主子食人食嘅肥膩嘢，或者朱古力、洋蔥、提子呢類毒藥。出街記得戴狗繩。
- 漸進式換糧：換牌子至少要用一星期慢慢加新糧，等腸胃適應。
生活環境清潔
除咗沖涼，屋企環境衛生都好緊要，抵抗力差就好易受病毒細菌感染。
維持腸道菌叢平衡
適量補充寵物專用益生菌，除了增強抵抗力同維持腸胃健康，仲可以幫助調整體質。
定期杜蟲及打預防針
病毒性腸胃炎傳染力好勁，一定要定期杜蟲同打預防針做足保護。
狗狗預防針打邊啲？→ 延伸閱讀：狗狗預防針點揀？3 分鐘了解狗狗疫苗！
狗狗腸胃炎常見 Q＆A
Q1：狗狗肚屙就係腸胃炎？
留意有無伴隨其他徵狀。
肚屙只係徵狀之一，成因可以係壓力或單純腸胃過敏。建議各位家長一旦見到主子屙到軟晒，最好即刻睇醫生。
Q2：狗狗可以食人嘅整腸藥嗎？（如：表飛鳴）
情況可能會更嚴重。
人同動物嘅腸道菌種唔同，劑量亦好難計準。生病嗰陣畀人藥反而可能加劇腹瀉。建議好返後餵寵物專用益生菌做保養。
Q3：腸胃炎會傳染嗎？
病毒引起嘅就會傳染。
由飲食不當引起嘅唔會傳染，但病毒性腸胃炎（如犬瘟熱）傳染力好強，會經排泄物傳播，多狗家庭一定要徹底消毒兼隔離！
總括嚟講，顧好日常飲食同定期杜蟲、打預防針先係護身符。當主子唔妥，千祈唔好自己亂畀藥，及早搵醫生先係愛佢！
延伸閱讀
