臘腸狗係好多香港家長鍾意養嘅品種之一！但你知唔知臘腸狗不為人知嘅秘密？短短嘅四肢配埋長長嘅身軀係佢哋嘅標誌，但呢種身型其實對脊椎同關節造成好大負擔…
等汪喵帶領各位家長一齊了解關於臘腸狗嘅冷知識，以及日常飼養照護嘅注意事項啦！
秘密 1. 臘腸狗其實係獵犬嚟㗎？
你有無發現，屋企隻臘腸狗超鍾意鑽窿鑽罅？其實同佢哋嘅獵犬天性有關㗎！
臘腸狗最早出現喺 16 世紀嘅德國，德文名係 Dachshund，「Dachs」代表獾，「Hund」係狗嘅意思。佢哋以前係專門獵捕獾、兔仔、狐狸等鍾意鑽入地洞嘅小動物。
嬌小、修長嘅體型，令佢哋可以順利鑽入狹窄嘅地洞同隧道；短而紮實嘅腳，幫佢哋快速挖開泥土；而長長嘅鼻就係嗅覺靈敏嘅特徵。
咪睇佢哋平時呆萌咁嘅樣，其實係超犀利嘅狩獵高手！
秘密 2. 臘腸狗配種唔可以隨隨便便？
臘腸狗嘅毛色好多種，有專家指出，唔同毛色帶有唔同基因，隱藏嘅遺傳性疾病亦都唔同。
好似常見嘅奶油色（Cream）臘腸狗，因為體內黑色素不足、皮膚抵抗力較弱，專家建議唔好隨便同其他淡色系交配，以避免將黑色素不健全嘅問題遺傳畀下一代。
為咗主子嘅健康，家長一定要了解清楚品種基因，千祈唔好胡亂自行配種呀！
【延伸閱讀】貓狗一定要絕育？絕育建議年齡、好處同風險全拆解
秘密 3. 臘腸狗曾經係奧運吉祥物？
1972 年喺德國慕尼黑舉行嘅夏季奧運會，吉祥物就係一隻名叫「Waldi」嘅臘腸狗。佢代表咗運動員耐韌、敏捷嘅特質，亦係史上第一個得到國際奧委會正式認可嘅奧運吉祥物！
為咗襯返臘腸狗活潑好動嘅個性，Waldi 嘅配色用咗淺藍、深藍、橙、草綠相間，當年做成各式各樣嘅紀念品，大受歡迎。
養臘腸狗一定要留心嘅事！
1. 脊椎負荷（椎間盤突出 IVDD）
臘腸狗係最容易出現脊椎問題嘅品種之一。常見徵狀係行動遲緩、唔想郁，嚴重嘅話會導致下半身癱瘓。
雖然脊椎問題同先天基因有好大關係，但家長可以透過日常照護嚟減低風險：
．禁止主子跳上跳落、行長樓梯
．抱抱時，一手橫抱胸口，另一隻手一定要托住屁股，保持水平
．定期補充葡萄糖胺、軟骨素，做好關節同脊椎保養
【延伸閱讀】狗狗關節炎徵兆同治療！獸醫教你點揀關節保健品
【延伸閱讀】狗狗癱瘓點算好？老狗癱瘓照護全指南
2. 嚴格控制體重
由於臘腸狗身長腳短嘅外型，一旦過肥，多出嚟嘅重量會對脊椎同膝蓋造成極大壓力。
家長要幫主子養成定時定量嘅飲食習慣，建議以低碳水、高蛋白嘅濕糧（如罐罐）為主食，仲要記得多啲帶佢哋落街散步，維持肌肉量呀！
【延伸閱讀】點樣幫狗狗減肥？獸醫教你制訂主子專屬減肥計劃！
3. 眼睛保護
視網膜萎縮退化（PRA）係臘腸狗中老年常見嘅健康問題。初期主子喺暗位睇嘢會變差，之後視力會逐漸衰退，嚴重會導致失明。
同關節退化一樣，PRA 係無得逆轉嘅。建議家長提早幫主子補充葉黃素等眼部保健品。
【延伸閱讀】狗狗對眼白濛濛？白內障嘅判斷與照護貼士
睇完呢篇文，相信你一定對臘腸主子有咗更深嘅認識：）
希望各位嘅主子都可以健健康康，陪住你一齊慢慢變老！
