各位家長平時有幫主子梳毛嗎？雖然貓咪都會用條脷梳理自己，但其實由剷屎官親自上陣，好處真係特別多㗎！
點解要幫毛孩梳毛？
減少屋企「貓毛滿天飛」
主子啲毛落到成屋都係，相信各位剷屎官一定好有共鳴！雖然毛孩跌毛係無可避免，但其實透過梳走身上多餘嘅廢毛，可以有效減少主子甩毛同埋屋企飄嚟飄去嘅毛髮。
保養皮毛、令毛色更靚
透過梳毛可以適度刺激皮膚，改善血液循環。循環好咗，主子嘅毛髮自然會更健康、更有光澤；同時可以減少積聚濕氣同細菌，幫手預防皮膚病。
即時「驗身」檢查身體
梳毛嗰陣要近距離接觸主子，過程中你可以順便檢查佢哋皮膚有無**異常紅腫、傷口或者不明腫塊**，及早發現就可以及早去診所醫治。
去診所嗰陣無咁驚
習慣咗梳毛嘅主子，基本上已經適應咗被人觸碰身體。當帶佢哋去見獸醫做檢查嗰陣，通常無咁抗拒，檢查過程都會順利好多。
幫助預防毛球症
**毛球症主要係因為主子舔毛嗰陣吞咗太多毛落肚，又排唔返出嚟，搞到腸道阻塞。** 乾咳、嘔吐同便秘都係常見徵狀。特別係春秋換毛季，梳走啲廢毛可以大大減少佢哋吞毛嘅機會。
５招令主子愛上梳毛
由細開始培養習慣
最好喺毛孩細細個嗰陣就培養梳毛習慣。如果係已經大個咗但未梳過毛，一定要慢慢嚟，先等佢習慣被摸，再慢慢介紹把梳畀佢，千祈唔好夾硬抓佢嚟「開梳」，否則佢一對把梳有陰影，以後就難搞喇。
由「安全位置」入手
開始嗰陣建議先梳頭頂，然後係面頰，亦可以趁佢哋瞓緊覺嗰陣梳，令佢哋覺得好似被人摸頭咁舒服。如果主子唔反抗，就慢慢梳到耳背、後頸、膊頭，最後先去背部同側身。記住唔好一嚟就梳肚腩，嗰度係好多主子嘅禁區，好易會嚇親佢哋。
力度一定要輕柔
一開始試吓輕輕梳，搵出主子最受落嘅力度，切忌太粗魯。如果發現啲毛打晒結，唔好死拉，試吓用手慢慢拆開先。
每日梳少少，好過一次梳好耐
如果等到啲毛打晒結先嚟處理，就要花好耐時間，主子好快會無耐性。建議**每星期最少梳兩次，每次大約 5-10 分鐘**，最理想就係每日梳。另外，唔好貪方便一次過做晒剪指甲、清耳仔同梳毛，分開時間做，主子壓力會細啲。
揀把好用嘅梳
最後，梗係要揀一把令主子覺得舒服、享受嘅梳啦。圓角設計嘅貝殼梳，比起一般市面上銳利嘅針梳，更能避免刮傷皮膚或者令毛鱗片受損。
日常梳毛其實唔使花好多時間，每日 5-10 分鐘，就可以換嚟主子一身靚毛同健康，快啲幫佢哋揀把心水梳開始啦❗
