貓咪尾巴意思 1｜喜
尾巴垂直向上，代表心情好好，呢個亦係細貓想親近貓媽嘅典型動作。
如果主子一邊高舉輕甩尾巴，一邊眼定定望住各位剷屎官，即係代表緊同你打招呼、想搵你撒嬌呀～
貓咪尾巴意思 2｜怒
受到外界威脅、驚嚇或者好嬲嗰陣，貓咪唔單止身體會變「大松鼠」，連條尾都會「炸毛」，令自己睇落大隻啲嚟嚇走敵人！
不過當貓咪玩到好興奮、好 High 嗰陣，條尾亦都有機會炸毛。家長可以根據當時嘅環境同情境嚟判斷主子係嬲定係玩得癲。
貓咪尾巴意思 3｜哀
貓咪心情低落嗰陣，條尾會垂低並微微晃動；如果感到好驚、好慌張，就會將條尾「夾喺兩條後腿之間」。
喺多貓單位入面，夾尾巴亦代表緊佢喺貓群中嘅地位比較低。
貓咪尾巴意思 4｜樂
當貓咪尾巴左右晃動，而且動作緩慢而大幅度，代表佢對某樣嘢好有興趣、亦係有自信嘅表現。
不過，如果貓咪係「快速搖尾」，或者得尾尖喺度擺動，咁就好可能係唔耐煩或者想發火嘅徵狀，呢個時候剷屎官就醒水啲，唔好再煩住佢喇！
貓咪尾巴意思 5｜纏繞
如果主子用條尾捲住你，就好似喺度「攬住你」咁，代表佢極之信任你㗎！
若果兩隻貓嘅尾巴互相纏繞，亦代表佢哋關係好融洽，願意一齊玩～
用力拉貓條尾？後果可以好嚴重！
貓咪嘅尾巴係脊椎嘅延伸，入面連住好多神經線。如果你用力拉佢哋條尾，除咗會令主子緊張受驚、好痛之外，仲可能會傷到神經，甚至連帶導致失禁或腹瀉反應。愛佢就千祈唔好亂拉主子條尾呀！
