貓咪嘔吐、軟便、肚屙（拉肚子）嘅原因有好多種，除咗環境變遷、情緒緊張或者嘔毛球之外，亦要小心係腸胃炎搵上門呀！到底有咩常見徵狀？主子肚屙嗰陣食益生菌有無用？平時應該點樣預防同照顧主子嘅腸胃健康？一齊嚟認識貓腸胃炎啦！
乜嘢係貓腸胃炎？
如果主子單純腸道唔舒服，多數會引起軟便、肚屙等徵狀；如果只係胃部唔舒服，最明顯嘅反應就係嘔吐。而貓腸胃炎就係指主子嘅腸同胃同時發炎，成因可能係細菌、病毒、寄生蟲，或者任何食咗落肚嘅藥物、唔乾淨嘅嘢食所引起。
點解主子會腸胃發炎？
- 病菌、寄生蟲感染、食咗變質食物或異物、中毒（例如誤食部分植物、家居清潔劑等）
- 其他疾病引起嘅併發症（例如胰臟炎、肝病、腎病等）
- 對部分藥物產生不良反應
貓腸胃炎徵狀
- 嘔吐同腹瀉（拉稀）同時發生
※ 嘔吐需要區分係咪單純嘔毛球，或者食得太快。腸胃炎引起嘅嘔吐可能帶有泡沫，甚至含有淡黃色嘅膽汁（嘔黃水）。
- 冇晒精神、活動力弱（變到好「慵懶」）
- 冇胃口、出現脫水跡象（因為長時間嘔同屙導致）
如果主子有明顯且嚴重嘅嘔吐、肚屙情況，建議先停止餵食同飲水，盡快帶去診所搵獸醫驗身同治療呀！
診斷與治療
雖然貓腸胃炎最主要徵狀係嘔同屙，但因為好多病都有類似反應，所以帶主子睇醫生嗰陣，提供盡可能詳細嘅病史，對醫生斷症好有幫助。呢啲資訊可以作為驗血、糞便檢查、腹部 X 光之外嘅判斷依據。
建議剷屎官準備定以下資訊交畀獸醫：
- 主子最近食過啲咩？有無「突然」轉過新糧？
- 最近餵食嘅頻率同份量？
- 屋企有無邊啲藥物、清潔劑等化學品佢可能接觸到？
- 主子有無過往嘅慢性病史？
- 近期有無去過醫院做治療？食過啲咩藥？
點樣預防同調理主子腸胃健康？
1. 環境、碗盤衞生
保持環境同食具整潔，避免病菌滋生！要徹底清潔主子食飯用嘅碗、枱面等，防止細菌跟住糧一齊食入肚。
2. 留意主子食咗啲咩
平時要注意主子會唔會對特定食材過敏，要確實避開。盡量等主子喺賞味期限內食完罐罐，避免嘢食變質生菌。
3. 良好飲食習慣配搭益生菌
定時定量、唔好畀佢哋暴飲暴食，係最基本嘅習慣。如果主子腸胃一向比較敏感，可以配搭寵物益生菌長期調理，幫助增加腸道好菌，建立更健康嘅腸道環境。
※主子肚屙緊仲食唔食得益生菌？如果主子嚴重嘔吐腹瀉，或者懷疑係腸胃炎，應該即刻睇醫生。唔好喺呢個時候亂餵益生菌或者夾硬塞嘢佢食呀！
4. 定期杜蟲（體內驅蟲）
香港環境潮濕炎熱，係寄生蟲生長嘅溫床。如果防護做得唔夠，主子好易感染寄生蟲引起腸胃不適。除咗環境整潔，定期杜蟲真係好緊要！
延伸閱讀：【常見疾病】貓狗寄生蟲感染全攻略
總結
腸胃健康係身體健康嘅根本。有強健嘅腸胃，先有良好嘅消化吸收力同免疫力。除了平時注意飲食，養成良好餵食習慣同補充適合嘅保養品，都可以幫手穩定主子嘅腸胃狀況㗎！
參考資料｜
1. PetAssure – Feline Gastroenteritis
2. VCA Hospitals – Gastroenteritis in Cats
