由血便顏色做初步判斷！
喺幫主子剷屎嗰陣，最驚就係發現佢哋啲排泄物有異樣！除咗屙唔出或者軟便之外，最令剷屎官焦慮嘅一定係貓咪血便。
血便同正常便便比落去有明顯唔同，各位家長可以由血便嘅顏色入面得到一啲健康資訊。
（一）混有血絲、鮮紅色嘅血便
呢種血便通常係因為貓咪嘅下消化道出血導致（例如直腸、肛門等位置）。
肛門腺發炎、寄生蟲引起嘅傷口、腸道發炎同腫瘤都係常見成因。另外，飲食唔均衡、飲水不足、壓力大或者便秘都有機會係因素之一。
見到少量血絲未必代表主子身體有嚴重問題，可以先視為一個徵兆，喺之後幾日密切留意便便情況。如果短期內無改善，甚至變嚴重咗，建議即刻帶主子去獸醫診所檢查！
（二）焦黑色、好似柏油咁嘅血便
焦黑血便通常係因為貓咪嘅上消化道出血導致（例如胃部、十二指腸等位置）。
誤食異物、胃潰瘍、十二指腸潰瘍、感染、寄生蟲或者嚴重腸胃炎，都可能會造成焦黑/啡色嘅血便。
焦黑色係因為血液經過胃酸消化後呈現嘅顏色。換句話講，由口腔、胃部開始到成個消化系統都有可能係病灶！所以黑色血便通常被視為較嚴重嘅問題，請一定要即刻就醫。
主子嘅便便包含好多健康資訊，健康同唔健康嘅便便都可以透過外觀分辨。
造成貓咪血便嘅 4 個常見原因！
（一）腸胃炎
腸胃炎可以係單一現象，亦可以係其他疾病嘅併發問題。食物過敏、中毒、病毒或細菌感染、壓力等，都可能導致貓咪腸胃發炎。
如果只係見到便便有輕微出血，好大機會只係腸胃發炎，但如果伴隨其他病徵，就要交畀獸醫檢查係咪有其他可能性。
延伸閱讀：貓咪嘔完又軟便拉稀？小心主子患上腸胃炎
（二）便秘與軟便
長期軟便或者便秘會令直腸內膜受損，導致便便染血。呢啲情況多數係因為唔正確嘅飲食或者生活習慣引起。
便秘通常係因為唔肯飲水、運動量不足或者消化不良；軟便就有可能係因為食物唔新鮮、突然轉糧或者腸道敏感導致。
（三）寄生蟲
蛔蟲、鞭蟲、鉤蟲等寄生蟲最鍾意喺貓咪消化系統「安家」，會咬傷腸道引起出血。除咗血便，主子仲可能會出現：腹瀉、嘔吐、體重跌、毛質粗糙、貧血或者肚脹等徵狀。
延伸閱讀：【貓狗常見疾病】寄生蟲感染全攻略
（四）貓瘟
貓瘟（正式名：貓泛白血球減少症）係一種傳染性極高嘅病毒性疾病。佢會攻擊主子嘅消化道、淋巴組織同骨髓，令免疫系統崩潰。
貓瘟會引起嚴重腸胃炎，令腸道黏膜嚴重受損。常見病徵仲包括淋巴腫大、抽筋、脫水同發燒。如果主子有呢啲徵狀，一定要爭分奪秒去睇醫生！
點解貓咪血便但精神仲係好好？
貓咪血便嘅成因廣義嚟講係「消化器官出血」，我哋唔可以單憑一次血便就斷定主子有大病。如果佢仲係跳跳紮、有胃口，代表可能只係遇到一啲小問題（例如輕微腸胃敏感）。
只要改善返飲食同生活習慣，血便通常會好轉。但如果血便頻繁出現，或者伴隨其他身體不適，就唔好等，一定要搵專業醫護人員檢查。
貓咪血便要點樣預防？
總括嚟講，血便大多數係疾病嘅併發病徵，所以要由根源做起，保護主子健康！
（一）建立正確飲食習慣
提供高品質嘅食糧，多啲鼓勵主子飲水，避免餵人食嘅食物（重油重鹽），咁樣先可以維持消化系統正常運作。
（二）定期做預防性杜蟲
揀合適嘅體內外杜蟲藥並定期使用，可以有效避免寄生蟲引起嘅血便問題。
延伸閱讀：杜蟲藥懶人包！貓狗口服藥、外用滴劑大比拼
（三）保持環境衞生
確保屋企乾淨，勤剷屎，令主子唔會暴露喺充滿病毒同細菌嘅環境入面。
（四）提供安穩嘅生活環境
舒服嘅環境可以減低主子壓力。記住壓力係會反映喺腸胃上面㗎！
（五）定期進行健康檢查
每年為貓咪做一次全面驗身，及早發現隱疾，根治問題。
延伸閱讀：寵物驗身有幾重要？檢查項目、注意事項一覽
（六）帶主子去睇醫生！
如果血便情況持續，或者有嘔、冇精神等問題，請唔好猶豫，馬上帶主子去診所！
汪喵星球，始終以毛孩為本。
我哋相信，毛孩就同小朋友一樣，值得擁有最好嘅選擇。
因此，我哋始終以毛孩嘅需求為出發點，由主食、零食、保健品到貓砂，持續研發最貼近需求嘅產品，帶畀佢哋幸福又健康嘅生活。
汪喵星球更希望透過每一次日常觀察，幫家長了解毛孩喜好，陪住主子一齊健康快樂咁慢慢變老！
