下定決心要養第二隻貓，卻唔知點樣介紹新貓畀舊主子識？如果不小心用錯方式，好可能會搞到日後貓咪關係好緊張。想兩隻貓喺同一個屋簷下和平共處，一定要了解貓咪嘅社交邏輯，用正確方式介紹彼此。新舊貓初次見面有咩地雷？正確嘅介紹 SOP 係點？
汪喵邀請咗專業寵物行為訓練師—單熙汝教大家點樣令新舊貓和平相處！
養第二隻貓前，要先了解貓咪社交邏輯
貓咪之交淡如水，換吓氣味就得？
貓咪成年之後就可以獨立狩獵，唔使靠團隊合作都可以自給自足。所以，貓咪之間可以話係「君⼦之交」。通常佢哋只需要透過氣味嚟交換訊息，可以唔⾒⾯就唔⾒⾯，甚至一世都無貓同伴都唔會覺得孤單，絕對係徹底享受獨⾏俠嘅⽣活。
正因為貓咪嘅邏輯係咁，當我哋帶一隻陌生貓返屋企嗰陣，簡直係違反咗貓界嘅生存之道。我哋眼中嘅「新朋友」，對舊主子嚟講反而係「不速之客」。如果無事先做足介紹步驟，兩隻貓好容易一見面就開火！
新舊貓之間最驚資源競爭！
喺香港有限嘅居住空間入面，引發兩貓關係緊張嘅主因有兩個：
1 單位空間、資源有限
室內空間唔似出面大自然咁大，可以畀貓咪用溫和方式去協商、重新劃分領地。原本主子獨享嘅資源，例如：嘢食、瞓覺位等，可能會被剝奪。呢種威脅感會令舊貓對新入屋嘅貓印象好差。
【延伸閱讀】貓狗不和點算？犬貓同居和平相處注意「三不三要」！
2 氣味唔同
氣味唔同代表彼此唔識亦唔係「自己人」，舊貓唔確定呢隻生保貓會唔會帶嚟病痛或者威脅。
所以，如果剷屎官無做好兩貓溝通嘅橋樑，就好易搞到佢哋打交、關係惡劣。養第二隻貓之前，一套正確又安全嘅「引薦 SOP」真係好重要！
正確「貓式」結盟！呢三點千祈唔好做
想新舊貓成為盟友，要用貓嘅邏輯嚟處理。其實只要主人唔好太過干預，大部分貓咪都傾向「能不衝突就不衝突」㗎！
養新貓後常見嘅錯誤介紹方式！
【地雷一】夾硬抱住主子去見新貓
直接抱住隻貓（或者用貓繩）去⾒另外一隻貓係大錯特錯。呢個動作會限制咗貓咪決定逃跑定溝通嘅權利。再加上大部分貓只有喺放鬆嗰陣先鍾意被抱。呢種舉動會帶嚟好大刺激，令主子更加緊張。
【地雷二】急住交換氣味
太急住用襪或者毛巾互抹去交換味道，一樣會令貓咪焦慮。一定要確認新貓已經適應環境，舊主子亦都回復平時放鬆嘅生活，先好開始嘗試接觸對方嘅味道。
【地雷三】共享零食、一齊食肉泥
叫兩隻唔識嘅貓「一齊食」肉泥係常見嘅錯誤示範。雖然嘢食好吸引，但對未接納彼此嘅貓嚟講，咁近距離一齊食嘢，反而會覺得對方想搶資源，食都食得唔安落。
【延伸閱讀】點樣辨別貓咪焦慮？主子紓壓三小貼士
收編第二隻貓：新舊貓和平相處 SOP！
介紹新貓畀舊主子識嗰陣，請掌握一個金科玉律：「⼀次只畀一種感官刺激！先聽、再聞、最後先⾒面。」
STEP 1. 聽！｜徹底隔離，但知對方喺度
帶新貓返屋企後，即刻送佢入準備好嘅隔離房。雖然靈敏嘅主子一定知多咗個「住客」，但咁樣係最唔刺激舊貓嘅方法。
一開始舊貓可能會因為新聲、新味而影響胃口或者瞓覺，仲會成日喺門口「查房」。呢個時候我哋要做嘅，係維持舊貓原本嘅生活習慣同埋同主人嘅互動，等佢盡快恢復安全感。
STEP 2. 聞！｜交換「巡邏地盤」
當兩隻貓都唔再在意對方把聲，肯等食、肯玩嗰陣，就可以開始交換巡邏空間喇！
貓咪巡邏嗰陣會喺物件上面留低氣味，咁樣可以令兩隻貓嘅味道自然結合。每日兩次，每次幾十分鐘交換地盤行吓，持續 1-2 週，主子就會更加熟悉對方。
STEP 3. 見面！｜遠距離「快閃」相親
氣味結合之後，終於可以見本尊！保持最少兩米距離，初次見面 1-3 秒就夠喇，製造一個短暫又無衝突嘅第一印象。
慢慢地，當貓咪唔再眼定定死盯住對方，可以各自食嘢玩嘢，就可以拉長見面時間（慢慢加到 5-10 分鐘），直至佢哋適應對方存在。
【延伸閱讀】打造舒適貓屋！理想養貓空間規劃指南
持續 2-8 週無衝突，先好正式解除隔離
收編第二隻貓一定要循序漸進。必須要兩隻貓都表現得唔緊張、唔在意，先可以去下一步。如果維持到 2-8 週都無任何衝突，先算正式成功。千祈唔好急，急就只會令關係更難修補。熟悉貓咪社交模式，先可以令新歡舊愛和平相處呀！
